ਸਾਈ ’ਤੇ ਲਿਖਿਆ ਹੋਇਆ ਇਕ ਸਮੂਹ ਗਾਣ*

ਪੰਜਾਬ ਸਿਰ ਕਰਜ਼ੇ ਨੂੰ ਮਾਫ਼ ਕਰ ਕੇ

ਸਾਰੇ ਲੇਖੇ-ਜੋਖਿਆਂ ਨੂੰ ਸਾਫ ਕਰ ਕੇ
ਦੁੱਖਾਂ ਦਰਦਾਂ ਦਾ ਦੇਖੋ ਭਾਈਵਾਲ ਆ ਗਿਆ,
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਜਲਿਆਂਵਾਲ਼ੇ ਬਾਗ ਦੀ ਪੱਤ ਜਿੱਦਣ ਲੁੱਟੀ
ਓਦਣ ਮਾਂ ਗੁਜਰਾਲ ਦੀ ਇਕ ਪੱਲ ਨਾ ਸੁੱਤੀ।
ਮਾਂ ਪੁਸ਼ਪਾ ਨੇ ਓਸ ਦਿਨ ਇਕ ਖ਼ਾਬ ਸੰਜੋਇਆ,
ਨੌਂ ਮਹੀਨੇ ਬਾਅਦ ਉਨ੍ਹਾਂ ਘਰ ਪੁੱਤਰ ਹੋਇਆ।
ਉਹੀ ਪੁੱਤ ਹੁਣ ਹੁਕਮਰਾਨ ਬਣ ਕੇ
ਦੀਨ-ਦੁਖੀਆਂ ਦੀ ਕਿਰਪਾਨ ਬਣ ਕੇ
ਸਾਰੇ ਹੀ ਜਹਾਨ ਉੱਤੇ ਦੇਖੋ ਛਾ ਗਿਆ
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਬੇਸ਼ਕ ਕਰਜ਼ਾ ਤੂੰ ਮਾਫ਼ ਕਰਾ ਦਿੱਤਾ,
ਖ਼ਲਕਤ ਪੰਜਾਬ ਦੀ ਸਦਾ ਕਰਜਾਈ ਤੇਰੀ।
ਸਾਰੇ ਦੇਸ਼ ਲਈ ਜਿਹੜੇ ਨੇ ਰਹੇ ਲੜਦੇ
ਉਨ੍ਹਾਂ ਲਈ ’ਕੱਲੇ ਦੀ ਹੈ ਲੜਾਈ ਤੇਰੀ।
ਉਸ ਪੰਜਾਬ ਦੀ ਹੀ ਢਾਲ ਬਣ ਕੇ
ਲਟ-ਲਟ ਬਲਦੀ ਮਸ਼ਾਲ ਬਣ ਕੇ
ਚਾਨਣਾ ਚੁਫੇਰੇ ਦੇਖ ਲਓ ਫੈਲਾ ਗਿਆ।
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਬੱਦਲ ਉਦੋਂ ਹੀ ਗੱਜ ਕੇ ਵਰ੍ਹ ਸਕਦੈ,
ਇੰਦਰ ਦੇਵਤਾ ਜਦੋਂ ਸਹਾਈ ਹੋਵੇ।
ਬੱਦਲ ਗੱਜਦਾ ਉਦੋਂ ਹੀ ਰਹਿ ਜਾਵੇ,
ਇੰਦਰ ਦੇਵ ਜੇ ਅੱਖ ਚੁਰਾਈ ਹੋਵੇ।
ਹੋਣ ਇੰਦਰ ਤੇ ਬਾਦਲ ਜਿਸ ਥਾਂ ’ਕੱਠੇ,
ਧਰਤ ਪੰਜਾਬ ਦੀ ਕਿਉਂ ਤਿਹਾਈ ਹੋਵੇ?
ਦੱਬਿਆਂ ਨਿਤਾਣਿਆਂ ਦਾ ਤਾਣ ਬਣ ਕੇ
ਨਿਵਿਆਂ ਨਿਮਾਣਿਆਂ ਦਾ ਮਾਣ ਬਣ ਕੇ
ਨਰੈਣ ਅਵਤਾਰ ਦਾ ਏ ਲਾਲ ਆ ਗਿਆ
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਗਿਆਰਾਂ ਸਾਲ ਦੀ ਅੱਲ੍ਹੜ ਵਰੇਸ ਤੇਰੀ
ਮੱਥਾ ਨਾਲ ਅੰਗਰੇਜ਼ਾਂ ਦੇ ਲਾਇਆ ਸੀ।
ਸਾਲਾਂ ’ਠਾਈਆਂ ਦਾ ਹੋਇਆ ਸੀ ਤੂੰ ਮਸਾਂ
ਅੰਗਰੇਜ਼ ਕੌਮ ਨੂੰ ਮਾਰ ਭਜਾਇਆ ਸੀ।
ਤੇਰਾ ਦੇਣ ਨਹੀਂ ਦੇਸ਼ ਇਹ ਦੇ ਸਕਦਾ
ਜਿਸ ਤੋਂ ਦਾਗ਼ ਗੁਲਾਮੀ ਦਾ ਲਾਹਿਆ ਸੀ।
ਡਟ ਗਏ ਜਿਹੜੇ ਹੁਕਮਰਾਨ ਬਣ ਕੇ
ਗੋਰੇ ਚਿੱਟੇ ਬਿੱਲੇ ਤੇ ਸ਼ੈਤਾਨ ਬਣ ਕੇ
ਉਨ੍ਹਾਂ ਲਈ ਬਣ ਕੇ ਭੁਚਾਲ ਆ ਗਿਆ
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਕੀ ਕੋਈ ਪਾਊ ਮੁੱਲ ਤੇਰੇ ਵਲੋਂ ਕੀਤੇ ਪਰਉਪਕਾਰਾਂ ਦਾ,
ਨਤਮਸਤਕ ਹੋ ਕੇ ਬੈਠਾ ਏ, ਅੱਜ ਕਾਫਲਾ ਸਰਦਾਰਾਂ ਦਾ
ਆਪਣੀ ਮਿਹਰ ਦੀ ਇਉਂ ਹੀ ਨਜ਼ਰ ਰੱਖਣੀ,
ਪੰਜਾਬ ਕਰੇਗਾ ਤੈਨੂੰ ਪਿਆਰ ਹਰ ਪਲ।
ਲੋੜ ਪਈ ’ਤੇ ਵਾਜ ਤੂੰ ਮਾਰ ਦੇਖੀਂ,
ਪੰਜਾਬੀ ਮਿਲਣਗੇ ਤੈਨੂੰ ਤਿਆਰ ਹਰ ਪਲ।
ਸਤਿਕਾਰ ਤੇਰਾ, ਸਤਿਕਾਰ ਪੰਜਾਬੀਆਂ ਦਾ
ਇਉਂ ਹੀ ਰਹੇਗਾ ਮਾਣ ਸਤਿਕਾਰ ਹਰ ਪਲ।
ਸੁਪਨਿਆਂ ਦਾ ਤੂੰ ਸੁਲਤਾਨ ਬਣ ਕੇ
ਪੰਜਾਬੀਆਂ ਲਈ ਰੱਬ ਦਾ ਐਲਾਨ ਬਣ ਕੇ
ਸੁਹਣੀ ਲਈ ਜਿੱਦਾਂ ਮਹੀਂਵਾਲ ਆ ਗਿਆ
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।
----
ਪੰਜਾਬ ਸਿਰ ਕਰਜ਼ੇ ਨੂੰ ਮਾਫ਼ ਕਰ ਕੇ
ਸਾਰੇ ਲੇਖੇ-ਜੋਖਿਆਂ ਨੂੰ ਸਾਫ ਕਰ ਕੇ
ਦੁੱਖਾਂ ਦਰਦਾਂ ਦਾ ਦੇਖੋ ਭਾਈਵਾਲ ਆ ਗਿਆ,
ਏਨੀ ਵਾਰ ਹਾਲ-ਚਾਲ ਪੁੱਛਣ ਪੰਜਾਬੀਆਂ ਦਾ
ਅੱਜ ਫੇਰ ਦੇਖੋ ਗੁਜਰਾਲ ਆ ਗਿਆ।

*17 ਅਕਤੂਬਰ, 1997 ਨੂੰ ਭਾਰਤ ਦੇ ਤਤਕਾਲੀ ਪ੍ਰਧਾਨ ਮੰਤਰੀ ਇੰਦਰ ਕੁਮਾਰ ਗੁਜਰਾਲ ਨੇ ਦਹਿਸ਼ਤਗਰਦੀ ਵਿਰੋਧੀ ਲੜਾਈ ਲੜਦਿਆਂ ਪੰਜਾਬ ਸਿਰ ਚੜ੍ਹਿਆ ਹੋਇਆ ਬਹੁ-ਕਰੋੜੀ ਕਰਜ਼ਾ ਮੁਆਫ਼ ਕਰਨ ਦਾ ਐਲਾਨ ਕਰਨ ਲਈ ਜਲੰਧਰ ਆਉਣਾ ਸੀ।ਪੰਜਾਬ ਦੀ ਅਕਾਲੀ ਸਰਕਾਰ ਸ਼੍ਰੀ ਗੁਜਰਾਲ ਦਾ ਸੁਆਗਤ ਬਹੁਤ ਹੀ ਬੇਮਿਸਾਲ ਤੇ ਇਤਿਹਾਸਕ ਢੰਗ ਨਾਲ ਕਰਨਾ ਚਾਹੁੰਦੀ ਸੀ। ਉੱਚ ਅਧਿਕਾਰੀਆਂ ਨੇ ਆਪਣੀ-ਆਪਣੀ ਅਕਲ ਦੇ ਘੋੜੇ ਦੌੜਾਏ, ਜਿਨ੍ਹਾਂ ਵਿਚੋਂ ਇਕ ਘੋੜਾ ਇਹ ਸਮੂਹ ਗਾਣ ਲਿਖਣ ਵਾਲੇ ਇਸ ਸ਼ਾਇਰ ਕੋਲ ਵੀ ਪਹੁੰਚ ਗਿਆ। ਇਸ ਸ਼ਾਇਰ ਨੂੰ ਸਬੰਧਤ ਅਧਿਕਾਰੀ ਨੇ ਕਿਹਾ ਕਿ ਇਹ ਗੀਤ, ਸ਼੍ਰੀ ਗੁਜਰਾਲ ਦੇ ਸੁਆਗਤ ਲਈ ਡੇਢ ਸੌ ਗਾਇਕ ਕਲਾਕਾਰ ਗਾਉਣਗੇ, ਜਿਸ ਕਰ ਕੇ ਹੁਣ ਇਹ ਗੀਤ ਨਹੀਂ, ਸਗੋਂ ਇਸ ਦੇ ਸ਼ਾਇਰ ਨੂੰ ਮਾਲਾਮਾਲ ਕਰ ਦੇਣ ਦਾ ਸਰਕਾਰੀ ਪ੍ਰਵਾਨਾ ਬਣ ਗਿਆ ਹੈ।ਇੰਨਾ ਪਸੰਦ ਆਉਣ ਦੇ ਬਾਵਜੂਦ ਇਹ ਗੀਤ ਉਸ ਦਿਨ ਇਕ ਵੀ ਗਾਇਕ ਵਲੋਂ ਗਾਇਆ ਨਾ ਗਿਆ, ਜਿਸ ਕਰ ਕੇ ਪੰਜਾਬ ਦਾ ਕਰਜ਼ਾ ਮੁਆਫ਼ ਕਰਨ ਆਏ ਪ੍ਰਧਾਨ ਮੰਤਰੀ ਦੇ ਸੁਆਗਤ ਲਈ ਇਹ ਗੀਤ ਲਿਖਣ ਵਾਲਾ ਸ਼ਾਇਰ ਕਈ ਵਰ੍ਹੇ ਕਰਜ਼ਈ ਰਿਹਾ ਸੀ ਕਿਉਂ ਕਿ ਉਹ ਅੱਜ ਵੀ ਇਸ ਗੀਤ ਦਾ ਸੇਵਾ ਫਲ ਉਡੀਕ ਰਿਹਾ ਹੈ।